Արտաշես I, Մեծ, Բարեպաշտ, Բարի,
Մեծ Հայքի արքա, (մ.թ.ա. 189-160թթ.),
Բրոնզ, 12 մմ, 1.47 գ.,
Արտաշատի դրամահատարան, արամեատառ գրությամբ,

Արտաշես I-ը Մեծ Հայքի Արտաշեսյան թագավորության և արքայատոհմի հիմնադիր-արքան է։ Սերել է Երվանդունիների հնագույն տոհմից։ Հայաստանին է վերամիավորել Երվանդունիների թագավորությունից անջատված և զավթված հայոց գավառները։ Արարատյան դաշտում՝ Արաքս և Մեծամոր գետերի ջրկիցում, կառուցել է Արտաշատ մայրաքաղաքը։

Դիմերես։ Դիմերեսին Արտաշես I-ի կիսանդրին է՝ դեպի աջ, մորուքով։ Թագը վերևում ավարտված է հինգ սրածայր ելուստներով, իսկ ներքևից՝ երկար, մինչև ուսերը հասնող ականջակալներով ու վզկալով, ճակատային մասում՝ թագի վրայից, կապված է արքայական ժապավենը, որի ծայրերը ծածանվում են մեջքի ետևում, և թագի կենտրոնը զարդարված է արևի պաշտամունքի խորհրդանիշ աստղով։ Դիտվում են նաև արքայական ծիրանու ծալքերը՝ ճարմանդված աջ ուսի մոտ։
Դարձերես։ Դարձերեսին դեպի աջ կանգնած շուն է, հավանաբար հայկական գայլախեղդ կամ գամփռ և արամեատառ գրություն՝ 𐡌𐡋𐡁𐡏 𐡏𐡓𐡕𐡇𐡔𐡎𐡂 (արամերեն՝ “rthṣsy mlk”, հայերեն՝ “Արտաշես արքա”)։